TIMOR GAP fornese no suporta servisu oioin ne’ebé presiza iha Tasi Timor liuhosi dezenvolvimentu parseria no empreza konjunta sira. Ami-nia servisu downstream prinsipál sira inklui:

• Kontratu kona-ba fornesimentu kombustivel entre ANATL E.P. no Postu Abastesimentu Suai estende ba tinan ida
• Kontratu fornesimentu kombustivel ho EDTL Betano Power Plant ba tinan 3 (2021-2023) ho valór tokon $59
• Dezenvolvimentu estasaun kombustivel foun
• Kontratu ho Rltelsil Eng Consultant Unipessoal Lda Association no ATT Consultant Co. Ltd atu avalia estasaun kombustivel sira ne’ebé eziste iha Dili
• Asina kontratu fornesimentu kombustivel ho BNCTL Branch Suai iha 2022
• Asina kontratu fornesimentu kombustivel ho World Vision Suai iha 2022.

Fornesimentu Kombustivel & Postu Abastamentu

Komponente importante ida husi TIMOR GAP nia negósiu downstream mak fornese kombustivel ba fasilidade nasionál no internasional sira. Agora dadaun, ami nu’udar fornesedór kombustivel ba sentrál eletrisidade Betano ho akordu atu haruka kombustivel mínimu Lot 1 ba períodu tinan 3 ho valór kontratu $59 milhoes. Ami orgullu hodi fornese ami-nia kombustivel ho kondisaun ne’ebé seguru liu ne’ebé kumpre rekizitu hotu-hotu husi QHSE no tuir valór no espesifikasaun tékniku ne’ebé rekere. 

TIMOR GAP harii instalasaun Depot Jet A-1 iha Aeroportu Suai nia laran atu fornese kombustivel aviasaun nian ba aviaun sira, ba operador sira ne’ebé servisu iha indústria offshore. Depot ne’e kompostu husi tanke kombustivel rua ho kapasidade 60kl kada, ne’ebé Austank mak manufaktura. Iha futuru, TIMOR GAP sei buka oportunidade ida atu habelar negósiu ne’e ba aeroportu sira seluk inklui Aeroportu Oecusse no Dili hamutuk ho renovasaun aeroportu ne’ebé planeia ona.

TIMOR GAP ninia objetivu mak atu estabelese prezensa ne’ebé forte iha merkadu kombustivel doméstiku liuhusi estabelesimentu rede retallu marka unika ida husi TIMOR GAP, ne’ebé habelar iha nasaun laran tomak, hodi fornese servisu no produtu sira ne’ebé di’ak liu atu responde no kumpre demanda produtu petróleu nasionál sira.

Ami nia estasaun kombustivel dahuluk hahú hala’o operasaun iha 2016 iha Suai no kontinua hala’o operasaun no fornese produtu diak hodi hetan fiar husi ami nia kliente sira no asegura kontratu foun ba fornesimentu kombustivel. TIMOR GAP planu atu harii bazeia ba susesu ida-ne’e hodi habelar no harii estasaun barak liután iha Timor-Leste tuir padraun servisu internasionál. Objetivu mak atu implementa pelumenus estasaun kombustivel 5 iha tinan 3 nia laran no kontinua ho implementasaun pelumenus estasaun kombustivel 1 iha kada munisípiu iha períodu tinan 5 oin mai (objetivu atu alkansa 30% husi partisipasaun merkadu).

Aleinde nee, TIMOR GAP servisu hela atu sosa estasaun kombustivel balun ne’ebé eziste iha Dili no Baucau.

Planta GNL

Planta GNL no kadoras nu’udar komponente downstream husi projetu Gas Natural Likidu Timor-Leste (TLNG) ne’ebé planeia atu harii iha kosta súl hanesan parte husi Projetu Tasi Mane.

Iha atividade lubuk ida-ne’ebé hala’o ona durante trimestre dahuluk no segundu tinan 2020 nian, ne’ebé mak iha supervizaun husi lideransa anterior. Investigasaun preliminár ba rota kadoras nian hala’o interna hodi fornese opsaun koñesimentu ida kona-ba rota diversifikasaun kadoras ba Natarbora, opsaun alternativa ba projetu nia fatin duke Beaço. Iha mós preparasaun dokumentu balun hanesan Terms Of Reference (TOR) no Request For Quotation (RFQ) ba Pre-FEED & Apoiu Peskiza ba kadoras, planu tenderizasaun no esbosu Kovite ba Bid (ITB). Iha tempu hanesan, ekipa prepara tiha ona Scope of Work (SoW) Estudu Plant Layout ba planta GNL. RFQ ba Estudu Plant layout nian fó sai ona ba eskritóriu Wood Reading (Legacy AFW), maibé kansela tia husi lideransa foun.

Intensaun prinsipál husi hapara temporariu projetu GNL ne’e liu-liu tanba iha asuntu upstream balun ne’ebé tenke rezolve uluk lai molok kontinua ho projetu Greater Sunrise. Diskusaun kona-ba asuntu relevante sira la’o hela entre kompañia Joint Venture Greater Sunrise no nasaun rua ne’e (Timor-Leste no Australia). Ida-nee inklui Kodigu Esplorasaun de Mineira do Petroleu (Petroleum Mining Code), Kontratu Fahe Produsaun (PSC), Rejime Fiskal, no konseitu dezenvolvimentu Upstream.

Relasiona ho ida-nee, atividade saida deit ne’ebé relasiona ho fábrika GNL inklui fatin ba fábrika GNL sei hapara hela no sei sujeita ba akordu desizaun husi parte relevante sira hotu.