TIMOR GAP ninia objetivu mak atu kria, hetan, dezenvolve no optimiza valór ekonómiku, komersiál no estratéjiku husi atividade sira ne’ebé iha upstream. Husi faze esplorasaun (estudu no peskiza), perfurasaun, produsaun to’o faze dezmantelamentu, TIMOR GAP nia servisu upstream hala’o liuhusi subsidiariu sira iha kraik.
Servisu Seismiku
Estabelese iha 2015, TIMOR GAP Seismic Services (TGSS) na’in husi TIMOR GAP (60%) no BGP Geo explorer Pte, Ltd (40%), subsidiariu husi Korporasaun Nasional Petroleu Xina (CNPC) iha negósiu fornese servisu seismiku marina. TGSS harii liu husi Akordu Konjunta ba Empreza ne’ebé asina ona iha Outubru 2015 husi kompañia rua ne’e ho objetivu atu fornese servisu peskiza seismika iha territóriu Timor-Leste, ho planu atu halo estensaun ba projetu sira iha rai-li’ur. Eskopu prinsipál husi TGSS mak atu hala’o akizisaun, prosesamentu no interpretasaun seismika 2D/3D iha futuru, no fornese oportunidade formasaun no dezenvolvimentu teknolojia ba nia funsionáriu lokál sira liuhusi nia parseiru internasionál sira.
Hafoin harii tiha, iha Dezembru 2015, TIMOR GAP lansa ona ninia peskiza dahuluk kona-ba seismiku 3D Broadband, ne’ebé envolve TGSS no BGP Geo explorer nu’udar kontratór sira atu hala’o akizisaun Crocodile 3D Seismic ne’ebé kobre área 2780 km2 iha PSC TL-SO-15-01. Peskiza ne’e hala’o husi ro Prospector BGP, hanesan 12 streamer seismic vessel, no konklui iha 2016. TGSS mós iha kompromisu atu buka parseiru potensiál atu buka oportunidade negósiu iha rai maran, ne’ebé rezulta iha asinatura akordu ida entre TGSS no PT.BGP Indonezia iha tinan 2018, atu servisu hamutuk iha Survey 2D Seismic iha rai maran ba territóriu nasional. Iha Agostu 2018, Timor Resources, operador PSC rai maran nian, envolve TGSS Joint Venture ho PT.BGP Indonezia hodi hala’o peskiza seismika 2D iha rai maran iha PSC TLOT- 17-08 (Bloku A), iha Covalima, no PSC TL-OT-17-09 (Bloku C), iha Manufahi, ne’ebé lokaliza iha area kosta súl Timor-Leste nian. Total servisu todan ne’e kobre maizumenus 308.4 km no hala’o tiha ona.
Hanesan parte ida husi envolvimentu foin lalais ne’e entre TGSS no PT.BGP Indonezia, parte rua kontinua reforsa sira-nia kompromisu atu estabelese armazenamentu esplosivu ida iha Timor-Leste iha tinan 2020, maibé tanba pandemia globál COVID-19 nian, planu no programa hotu-hotu adia tiha ona ba tinan 2021. Nunee mos, TGSS kontinua envolve an iha atividade seismiku hotu iha territóriu nasionál Timor-Leste nian, hanesan levantamentu seismiku ne’ebé TIMOR GAP planeia atu hala’o iha nia bloku reservadu, no mós bloku potensiál sira seluk iha rai maran ka/no tasi laran.
Servisu perfurasaun
TIMOR GAP Drilling & Services, Unipessoal, Lda, ne’ebé mós koñesidu nu’udar TGDS, nu’udar subsidiariu totalmente na’in ba TIMOR GAP ne’ebé estabelese iha 2017. Estabelesimentu TGDS ne’e importante hanesan resposta ba kompleksidade, dezafiu no nesesidade sira hodi fornese servisu iha negósiu upstream. Objetivu prinsipál husi TGDS mak atu kria, identifika no optimiza valór ekonomia komersiál nian liuhusi oportunidade negósiu nian liuhusi fornesimentu servisu ba atividade perfurasaun liuliu iha área esplorasaun, dezenvolvimentu, produsaun, abandonamentu no servisu upstream sira seluk.
Hahu husi kedas nia harii, TGDS partisipa ona iha projetu sira hanesan Bayu-Undan Infill Well (BUIW), ENI Drilling Campaign no Onshore block A & block C Drilling Campaign. Iha tinan 2020, TGDS partisipa iha Santos’ BUIW Phase 3c (P3c). Ba projetu partikulár nee, TGDS hamutuk ho COSL hakarak fornese Mobile Offshore Drilling Unit Services. TGDS mós iha intensaun atu fornese servisu rua seluk, hanesan, Casing & Tubular running & Cold cutting Specialist services and Rig Engineering & Modification services hamutuk ho nia parseiru, Petroleu-Vietnam Drilling (PVD). Hanesan parte husi parseria iha futuru, TGDS no PVD foin lalais ne’e asina ona Memorandu Entendimentu ida hodi hametin liután kooperasaun nee.
Pandemia globál COVID-19 tinan 2020 mós afeita ona atividade barak liu husi TGDS, inklui, maibé la’ós limitadu, ba kompromisu husi TGDS no ninia parseiru sira atu estabelese fábrika Liquid Mud no Fasilidade armazenamentu Liquid Mud iha Suai. TGDS mós ho objetivu atu estabelese parseria estratéjiku no ekonomia viavel ida hodi buka dalan komersiál ne’ebé di’ak liu atu dezenvolve fila-fali kampu Bayu-Undan no proativamente buka empreza potensiál sira atu kaptura oportunidade negósiu foun sira ba prestasaun atividade upstream no servisu perfurasaun.
