AMI NIA SUSESU DEPENDE BARAK BA AMI NIA REKURSU HUMANU NO AMI NIA KAPASIDADE INSTITUSIONAL
Desde TIMOR GAP harii, ami atrai ona rekursu humanu talentu sira atu realiza ami nia potensiál tomak. Ami fiar metin katak ho estabelesimentu fundasaun institusionál no lideransa nian ida ne‘ebé forte iha tinan hirak ikus ne’e, sai hanesan fatores importante ida ba ami nia abilidade atu hatán no adapta ba alterasaun no dezafiu signifikativu sira ne‘ebé sei mosu mai, inklui rekuperasaun ekonómika no sosiál hafoin pandemia COVID-19.

AMI NIA FUNSIONÁRIU SIRA

Ami sente orgullu ho grupu ema lubun boot no dedikadu sira ne‘ebé servisu iha empreza no ho ami nia empreza. Ami hakarak atu hasae kapasidade funsionáriu nian, no ajuda harii komunidade iha fatin ne‘ebé ami halo servisu ba. Ami fornese oportunidade ba funsionáriu sira atu bele dezenvolve tan sira nia kompeténsia profesionál wainhira ami  hala’o atividade atu atinji ami nia misaun. 85% husi ami funsionáriu hetan ona, ka agora dadaun atu hetan, edukasaun nivel aas, no ami nia funsionáriu kuaze iha esperensia akademiku no prátika iha area tékniku inklui enjeñaria no operasaun negosiu. 

Ate Jullu 2022, ami iha funsionáriu hamutuk na’ in 134.  Mane hamutuk 72% no feto hamutuk 28%. Ami nia numeru funsionáriu total, no mos numeru funsionáriu feto sei sae gradualmente iha tinan hirak tuir mai, hafoin kresimentu no dezenvolvimentu linha emprezarial oi-oin nunee mos ami nia portofolio ativu. Hanesan kompania Estatal, ami prioritiza rekrutamentu husi ami nia talentu nasionál sira. Agora dadaun ami nian funsionáriu 93% Timor oan no 7% internasionál, ne‘ebé maka ami kontrata atu prienxe kompeténsia tekniku sira ne‘ebé maka Timor oan seidauk bele prienxe. 

TIMOR GAP sei kontinua investe iha nia  funsionáriu no sei ajuda sira dezenvolve sira nia abilidade no kapasidade ne‘ebé di’ak ne‘ebé presiza hodi harii ekipa ne’ebé susesu. Ida ne‘e aplika mós ba ami nia parseiru sira ne’ebé adere ona ba ami nia estratéjia konteúdu lokál ne‘ebé forte hodi garante katak Timor oan sira nia talentu bele dezenvolve no uza. Porezemplu, ami-nia projetu sira iha terrenu, inklui Postu Kombustivel Suai no Aeroportu Jet Fuel Depot, uza exklusivamente pesoál lokál, no hetan formasaun hosi ami nia parseiru emprezariál sira.

AMI NIA LIDERANSA

Introdusaun ba Membru do Konselho de Administrasaun no Komisaun Ezekutiva iha sesaun tuir mai:

António de Sousa, Presidente & CEO 

Sr. António de Sousa gradua iha tinan 1998 ho Lisensiatura iha Engenharia Mineira husi ITB, Bandung, Indoneisa, ho espesializasaun iha Mekaniku ba Fatuk, no iha tinan 2007, ho Mestradu iha Engenharia do Petróleo husi NTNU, Trondheim, Noruega, ho espesializasaun iha Engenharia de rezervatóriu (Reservoir)/Simulasaun. Sr. Sousa iha kareira naruk ho tinan 20 resin esperensia iha kampu mina no gás no espesializasaun iha Engenharia de rezervatóriu (Reservoir)/Simulasaun, geomekánica, no Jestaun. Antes ne’e, Sr. Sousa servisu hanesan enjeñeiru ba Reservoir Simulation no Dezenvolvimentu Negosiu iha North Sea Non-Operated Assets, Subsurface Department, Premier Oil Plc, Aberdeen in Scotland, UK, no hanesan enjeñeiru ba Reservoir Simulation and Geomechanics iha Schlumberger Data Consulting Services, Paris, France. Sr. Sousa desempenhou funsaun hanesan komisariu Timor-Leste ba JPDA no mos komisariu suplenta ba Greater Sunrise, iha periodu tinan 2007 – 2018. Hafoin TIMOR GAP estabelese iha tinan 2011, Sr. Sousa hetan nomeasaun hanesan membro do Konselho de Administrasaun da empresa, no iha Setembru 2014, hetan nomeasaun ba Vise Presidente. Iha Jullu 2020, Sr. Sousa hetan nomeasaun hanesan Presidente & CEO TIMOR GAP.

Gabriel de Oliveira, Membru do Konselho de Administrasaun.

Sr. Gabriel de Oliveira hetan nia Lisensiatura iha Geolojia husi Institutu Teknolojia Adhi Tama Surabaya (ITATS) no nia mestradu husi Universidade Evora, Portugal ho major iha Geosiénsia, iha tinan 2009. Sr. Oliveira iha esperiénsia tinan ida nu‘udar Xefe Laboratóriu Sekretáriu Estadu Rekursu Naturais (SERN) no liu tinan ualu nu’udar dosente universitáriu no Xefe Departamentu Geolojia no Petróleu iha Universidade Nasionál Timor Lorosa ‘e. Iha tinan 2020, Sr. Oliveira asume knaar hanesan Prezidente Institutu do Petróleu no Geolojia – Institutu Públiku, no mos membru do Konselhu de Administrasaun TIMOR GAP.

Rui Ferreira Magno, Membru do Konselho de Administrasaun.

Sr. Rui Ferreira Magno gradua iha tinan 1999 ho Lisensiatura iha Estudu Dezenvolvimentu Ekonomiku, husi Catholic University of Parahyangan, Bandung, Indonesia, no hetan mos Lisensiatura iha Jestaun Finanseiru, husi STIE Malangkucecwara School of Economics (MCE), Indonesia. Sr. Magno iha kareira estensivu iha area finanseiru ho esperensia profesional liu husi tinan 20, inklui espesializadu iha kontabilidade no jestaun orsamental. Sr. Magno hahu nia kareira iha tinan 2000, iha Organizasaun Non-Governamentál ADRA, hanesan asesor no depois avansa ba Xefe Departamentu ba Diresaun Nasionál de Tesouro (Unidade ba Exekusaun Orsamentu) iha tinan 2003, Xefe Departamentu ba Unidade Payroll iha tinan 2012, no Diretor Nasionál ba Pagamentu husi Diresaun Gerál Tesouro iha tinan 2013, no mos Diretor Geral ba Tesouro, iha Ministeriu das Finansas. Sr. Magno hetan nomeasaun hanesan membru do Konselho de Administrasaun TIMOR GAP iha tinan 2022.

Amandio Soares, Membru do Konselho de Administrasaun.

Sr. Amandio Soares remata nia estudu iha tinan 2005 ho Lisensiatura iha Siénsia Aplikada iha Geolojia Petroleu, espesialiasaun iha Análize Facies (Análize Basin), husi Universidade Padjadaran Bandung, Indonézia. Sr. Soares iha tinan 20 liu ba servisu iha seitor mina no gas, halao funsaun iha Ministeriu hanesan supervizor ba atividade petroleo, hanesan Diretur ba Diresaun Nasional balun, Geologista no Asesor Senior. Antes ne‘e, Sr. Amandio Soares hala’o funsaun hanesan Geolojista Senior iha Ministériu Petróleu no Minerais, no tuir mai hanesan asesor senior ba Ministru Petróleu no Minerais. Iha TIMOR GAP, iha Otubru 2020, Sr. Soares hanesan Membru Konsellu Administrasaun no nu’udar Asesór Prinsipál no Relasaun Profesionál Govermentál nian iha empreza ne‘e.

Francelino Boavida, Membru do Konselho de Administrasaun, no Diretor Unidade Negosiu Downstream

Sr. Francelino Boavida remata nia estudu iha 2011 ho Lisensiatura iha negosiu, Major in Negosiu Internasionál no Minor iha Applied Marketing husi Universidade Sunnabilan Coast, Queensland, Australia. Nia simu Prémiu exelénsia ba Dezenvolvimentu Planu Esportasaun ba kompañia Australianu Tank Liner durante nia estudu iha tinan ikus. Sr. Boavida iha esperiénsia tinan barak ho organizasaun doadór sira, hanesan, World Bank, GTZ no USAID. Nia servisu hanesan Treinador Negosiu no Espesialista Marketing durante tinan neen (6) no ikus mai servisu hanesan Konsultor Dezenvolvimentu Negosiu ba kurtu prazu ho kontraktor DAI husi USAID nia Projetu Dezenvolvimentu Setor Privadu. Sr. Francelino Boavida tama iha TIMOR GAP iha tinan 2012, hanesan Junior Chartering Analyst, profesionalmente progresu nia kareira neineik iha tinan hirak nia laran iha kompañia ne’e nia laran. Sr. Boavida sai nudar Xefe Ekipa ba Trading and Marine Chartering iha 2014, no Jestor ba Business & Trading iha 2016. Nia asumi kargu nuudar Vice Diretór ba South Horizon Off shore Services, Lda, ho susesu lidera kompania parseria ne’e manan kontratu Bayu-Undan Topside Engineering. Sr. Boavida sai Diretór ba Unidade Negósiu Downstream no Membru Konselhu Administrasaun TIMOR GAP iha tinan 2020.

José da Conceição, Vise Presidente

Sr. José da Conceição hetan Mestradu de Direitu (LLM) iha Leis no Polítika Internasionál Petróleu nian, husi Center for Energy, Petroleum, Mineral Law and Policy, University of Dundee, Scotland, UK. Nia mós hetan Mestradu ida tan (MDip) iha área Lei Negósiu Internasionál nian husi London College, United Kingdom. Iha tinan 2011, Sr. José remata nia Lisensiatura iha Lei Komersiál, no iha tinan 2010, hetan BTEC of HND in Law husi Solent Business School, Law and Enterprise, Southampton Solent University, UK. Iha tinan 2008, Sr. José kompleta ona estudu Avansadu Engineria ba National VQ in Motor Vehicle iha Southampton City College, United Kingdom. Sr. José iha esperiénsia servisu barak, inklui tinan 8 Analista Legál ba iha Área Dezenvolvimentu Petrolíferu Konjunta (JPDA), no ba Komisaun Konjunta ba JPDA no Komisaun Sunrise iha eis Prezidente no Administradór Ezekutivu TIMOR GAP nian. Sr. José mós servisu besik tinan 9 ba kompañia oi-oin iha Reinu Unidus no nia mós hanesan dosente part-time ba estudante lisensiatura tinan ikus iha area Marketing Internasionál no Komérsiu Internasionál iha Dili Institute of Business Institute (IOB). Iha fulan Jullu 2020, Sr. José hetan nomeasaun hanesan Vise Prezidente TIMOR GAP.

Josè Tilman, Diretor Unidade Negosiu Upstream.

Sr. José Tilman hetan Mestradu ba Siensia iha enjeñaria Petroleu espesializada iha enjeñaria rezervatóriu, Universidade Stavanger, UiS – Noruega. Sr. Tilman iha esperiénsia liu tinan 18 iha indústria mina no gas, no liu tinan 9 iha esperiénsia kona-ba operasaun ba ekipamentu produsaun iha tasi laran, liu-liu ekipamnetu dehydration and cold processes, ekipamentu wellhead no Planta fractionation. Sr. Tilman servisu iha tékniku operasaun mekánika, husi 2003 to‘o 2005, no nu’udar tékniku produsaun nian, husi 2005 to‘o 2009, iha Projetu Resiklajen Bayu-Undan nian, iha Tasi Timor. Sr. Tilman tama iha TIMOR GAP iha tinan 2012 no iha ona esperensia liu tinan 9 serbisu ba esplorasaun no produsaun (Setor Upstream) iha empreza ne‘e. Antes ne’e iha TIMOR GAP, hala‘o funsaun prinsipál sira inklui lidera no superviziona ekipa sira ne’ebé tau matan ba Jestaun Perfurasaun, Dezenvolvimentu & rezervatóriu no Departamentu Apoiu Negósiu husi Unidade Esplorasaun no Produsaun ne’e. Funsaun seluk mak hala‘o hela estudu reservatoriu ba kampu Bayu-Undan no Greater Sunrise, ne’ebe lokaliza iha Tasi Timor, kona-ba oinsa atu optimiza senáriu dezenvolvimentu ba kampu Greater Sunrise no mos Kontratu Fahe Produsaun ba kampu Bayu-Undan (PSC) 2022 nudar parte husi jestaun rekursu no estratejia optimizasaun. Agora dadaun, Sr. Tilman hanesan Diretor ba Unidade Negosiu Upstream, ne’ebé jere, lidera, superviziona no koordena projetu sira upstream nian ba kompañia ne’e.

Francisco Ferreira, Diretor Unidade Projetu Tasi Mane

Sr. Francisco Ferreira hetan Diploma enjeñaria Petróleu nian, hosi Central Institute of Technology, Western Australia no Lisensiatura ba enjeñaria Petróleu husi Dili Institute of Technology. Sr. Ferreira servisu iha seitor mina no gas durante tinan 15 liu ona. Durante tinan 10, nia serbisu li-liu nu’udar ofisiál mina no gas rai maran nian, ho responsabilidade halo mapamentu ba area mina no gas iha rai maran, no Sr. Ferreira mós hola parte iha levantamentu sízmiku rai maran dahuluk; hola parte ho universidade no Kompañia Internasionál Petróleu nian ba peskiza kobre Ilha Timor ba Geolójika no Geofísiku rai maran; no iha esperiénsia servisu ho ANPM (Autoridade Nasionál Petróleu no Minerais), hanesan Análista downstream ho responsabilidade atu tulun Diretór Downstream nian hodi prepara matadalan no identifika oportunidade negósiu downstream nian hodi estabiliza atividade downstream nian. Sr. Francisco Ferreira servisu liu tinan 8 ho Projetu Tasi Mane, hanesan Analista GIS ho responsabilidade atu halo mapeamentu ba fatin projetu kosta-súl tomak, no lidera ekipa Interministerial atu hala’o sosializasaun, identifikasaun rai no propriedade sira, rekolla no análize dadus, publikasaun dadus no asinatura kontratu ba rai no propriedade sira ne ‘ebé afetadu hosi projetu ne’ e. Iha fulan agustu tinan 2020, Sr. Francisco Ferreira hetan nomeasaun hanesan Diretór ba Unidade Projetu Tasi Mane iha TIMOR GAP.